02 Mar SANYSEC – OURENSE ATLETISMO NO CAMPIONATO DE ESPAÑA ABSOLUTO

O Sanysec – Ourense Atletismo participou no Campionato de España Absoluto de Pista Curta a través de catro das súas atletas.

A mellor posición foi a cuarta praza obtida por Andrea Reija no pentatlón con 3877 puntos. Rematou a 58 puntos da terceira praza obtida por Ivet Rovira do L´Hospitalet Atletisme. De entre as cinco probas, logrou o seu mellor posto no peso, ao quedar segunda con 11.72 metros e o peor na lonxitude, undécima con 5.23.

Obtivo posto de finalista no salto de altura Iria Solera, cunha marca de 1.75 que lle valeu a oitava posición. Espectacular concurso no que entre a terceira praza e a novena posición saltaron todas as atletas a mesma altura. Así, os dous nulos sobre a altura de 1.75 foron os que lle privaron da medalla.

No salto con pértega, Manuela Blanco foi novena con 3.60 metos. Foi a única altura na que realizou un salto válido, posto que non puido superar o listón sobre o 3.80.

Sen saír dos saltos, Daniela Rubio ocupou a 15ª praza no triplo salto cun mellor salto de 11.58, lonxe dos 12.65 cos que se pasou á mellora.

Andrea Purica competiu nos 60 lisos fóra de concurso, ao non ter a nacionalidade española. Gañou a súa eliminatoria con 7.24 segundos e a súa semifinal con 7.29, sen poder ocupar un posto na final pola súa condición de atleta estranxeira. Coas marcas que realizou nas roldas previas, de ter participado na final, conseguiría a medalla de prata.

Podes consultar os resultados ao completo na seguinte ligazón:

Campeonato de España de Short Track